騰訊 - 24號出業績，相信會係正面嘅結果，我買騰訊咁耐，只係佢跌就加倉，輸錢嘅機會其實唔係大，如果未必會一手手買嘅朋友，月供其實都係一個好嘅選擇。我相信大家都絕對會相信騰訊嘅基本面，財務狀況係非常好，業務發展非常有持續性，手持上市公司股票市值分分鐘大過佢公司市值，所以我認為係仍然低估。假如大市真係下跌，其實佢未必會比別人得多，當然如果佢回升都未必會比別人咁快。但係其實如果用長線去睇，基本唔會輸錢，而家只係睇佢月尾公布業績會唔會拆股。

HKTVmall - 今個月尾出2020年業績，我相信結果應該都係之前預期範圍之內，未必太超預期，GMV一早已經寫晒出嚟，除非佢廣告收益增加好多，否則2020年都係現時股價個估值。佢每個月電商平台可以保持到銷售額，基本上佢每年都一定賺錢，最緊要睇吓佢會唔會出2021年業績指引，相信今年業績會係爆炸期！又或者睇佢會唔會細分一啲行業嘅數據，例如係外賣，轎車行業等等唔知佢會唔會仔細公布，但我相信。。唔會。

快手 - 相信都會係三月出業績，因為股權激勵關係，相信佢會係帳面虧損超過千億，同小米美團Palantir 上市時一樣，所以到時一定會見到好多媒體大肆宣揚話佢說呢間公司蝕好多錢。以剛剛恒生指數檢視出咗之後，快速機制納入恒生指數只要上市超過三個月就得，我相信五月嗰陣佢好大機會會納入去指數。到時出成績，主要睇用戶人數同埋業績增長，電商部份增長都係極度快速，2018年電商平台交易好似7千定9千萬，2019年做500幾億，2020年頭11個月做3326億，媽的，咩玩法？速度係咁？只睇佢今期日用戶人數或月用戶人數，還有佢個GMV增長，毛利同純利等等，我相信後兩個都係負數，仍然係燒錢買增長，佢用戶量同抖音仲係未有得比，得60%左右。

Palantir - 之前寫過佢關於業績報告，都表明過我對佢嘅業務範疇非常有信心，財務報表亦都非常之穩健，我相信2021年會係有正利潤，以佢嘅手持現金比負債還要高一倍，即係公司絕對唔缺錢去增長。近期大跌我相信除咗係美國10年債息上升影響一啲未賺錢嘅科技企業之外，亦都係包括佢好多高管拋售股票，所以講緊係幾百萬至千萬股咁樣拋售，因為佢哋基本上冇任何成本，工作左10幾年，解禁之後拎返現金唔出奇，但我依然相信佢嘅業務獨特性同埋增長我相信管理層定出嚟嘅增長目標，到時實際業績會高於預期，所以到今天為止沒有任何減持，長期持有，之前在29和31增持左。

FUTU - 增長超勁，大家都一定聽過身邊越黎越多人去開FUTU 牛牛戶口，睇番佢第三季增長係以幾倍速度增加，相信黎緊第四季一樣係快速增長。但下年能否咁樣幾倍咁增長呢，我相信就難d。我一直思考佢個股價增長左幾倍，業績會唔會都有咁多倍增長，如果增長到咁快就可以支持到咁高估值，相信仲需要啲時間睇業績去驗證呢句說話，應該都會係三月出業績，到時再睇睇。我就咁睇佢並唔單止係傳統嘅網上證券交易商，融資平台外，亦都係一個證券社交平台，股市越暢旺，越多人討論，假如牛牛圈有好多爭戶，到時咪又變成廣告平台？ 我相信佢能夠賺嘅錢越多範疇，到時再睇睇佢份財務報表。其實我買佢，其中一個原因係用嚟不斷做期權，因為佢權金較高，所以用黎賺期權金，但我相對買在高位，必須要靠期權金去降低成本。